Máis de 200 nenos e nenas de Educación Infantil e Primaria do CPI de Zas e do CEIP Labarta Pose participaron esta mañá no contacontos “O Poeta da Terra”, de Polo Correo
do Vento.

Esta foi unha actividade organizada polo Concello de Zas con motivo do Día Internacional do Libro, que se conmemora cada 23 de abril, e que se engloba dentro da programación especial dos 100 anos do pasamento de Enrique Labarta Pose.

O contacontos “O Poeta da Terra” representouse no CPI de Zas e no CEIP Labarta Pose. O espectáculo dividiuse en dúas partes. Na primeira, os membros de Polo Correo do Vento
encargáronse de contarlle á rapazada aqueles aspectos máis impotantes da vida e obra de Labarta ao mesmo tempo que realizaban unha caricatura do noso polifacético veciño. E na segunda parte, o alumnado fixo o seu propio debuxo de Labarta guiados polo debuxante.

O Alcalde de Zas, Manuel Muíño; e a Concelleira de Educación, Pilar García; tamén quixeron achegarse ata os centros de ensino para presentarlles este espectáculo e convidalos a
mergullarse no mundo da lectura.

Este contacontos naceu ao mesmo tempo que o primeiro libro infantil adicado a Labarta e que tamén leva por título “O Poeta da Terra”. O Concello de Zas, xunto con Lela Edicións, publicou este libro en outubro do ano pasado e xa se repartiron máis de 500 exemplares entre o alumnado do Concello de Zas e nos centros de ensino e bibliotecas municipais de toda a Costa da Morte.

Esta é unha nova acción do Goberno Municipal para dar a coñecer e poñer en valor a figura de Enrique Labarta Pose e conseguir que se lle adique o seu propio Día das Letras Galegas.